Mar 15 | BMK | STEP | Boiboighi nubanubanai prist babadisi, Dam Jiu babadisi, touvibeyebeyena Mosese ina vigheiyenai, ma Sanhedrien tupana ivi boru, ivi vagheina da avai ita berai Yesu kurina. Imana ipatumi ma ikasi veiya ineyei Pailat kurina.

b 15:34Psalm 22:1

Mark 15

Yesu Pailat Maghinonai

(Matiu 27:1-2, 11-14; Luk 23:1-5; Jon 18:28-38)

1 Boiboighi nubanubanai prist babadisi, Dam Jiu babadisi, touvibeyebeyena Mosese ina vigheiyenai, ma Sanhedrien tupana ivi boru, ivi vagheina da avai ita berai Yesu kurina. Imana ipatumi ma ikasi veiya ineyei Pailat kurina. 2 Pailat ivi taravirei, “Tam na Dam Jiu Keivavona bo?”

Ma Yesu ikipotei ivavo bo, “Vagheina kuvavo.”

3 Prist babadisi vi wavuwavu ipesari sasara Yesu ivivi wavui, 4 touna kubina Pailat ivi taravira meyei, “Kade kwa kipotesi bo kegha? Asi vi wavuwavu ku viyanei!”

5 Bade nuke iya sisiya sago ita vavo meyei ma Pailat ivi deiyei.

Dam Jiu Asi Kayowana Da Yesu Ina Siraghe

(Matiu 27:15-26; Luk 23:13-25; Jon 18:39-19:16)

6 Sovona Voura kamna nununai, maranai Pailat ina bera nuke imakemake, da panipani sago iyai rava ivivi bagheiya na ivovo tariya. 7 Nani koroto kana wava Barabas dibura numanai korokoroto ruwamtousi meiteni, rava ivi siraghenisi, maranai Rom gabemanina meiteni ivivi ghaviya, na ipanisi. 8 Maranai numaduba ivi siyagosi, ma ivi karei da Pailat ini baghai, ikimakava marana nununai ivivi nuwa beibeinisi na nuke.

9 Pailat isakova kirakiyei da prist babadisi Yesu inuwakapiyei kubina ivo riyei ku imana. Vagheina ma numaduba ivi taraviresi, “Ami kayowana kubimi da Dam Jiu Keivavona ana tariya?” 11 Bade prist babadisi numaduba isunasi da iti baghai, epaiyana, na Pailat Barabas ina tariya kubisi.

12 Pailat numaduba ivi taravira meyesi, “Bade avai, ko kayokayoweku da ravana sago ko woreworei Dam Jiu Keivavona kurina ana berai?”

13 Iru kwatu potei, “Ke tututani!”

14 Ma Pailat ivi taraviresi, “Avai berana berona iberai?” Iru kwatukwatu kirakai ponasi keidamonai, “Ke tututani!”

15 Pailat ikayowei da numaduba iti nuwabeibeinisi, touna kubina Barabas itariya kubisi. Touvighavighaviya ikisi da Yesu ita wudiya ma ita ru teinaneyei da ita tututani.

Tou Vighavighaviya Yesu Ivi Namei

(Matiu 27:27-31; Jon 19:2-3)

16 Touvighavighaviya Yesu iruteina ruwei Pailat ina numa ku garina, ma touvighavighaviya asi rava tupasi yavu iworesi da ivi siyagosi. 17 Gara yebara dumadumana Yesu ivi kotei ma vadara keyama raghana tonatonanai ikou pipini, ma ku tepapuna ivo tupei. 18 Ma ivi karei da ivivi namei, “Enosaire! Dam Jiu asi Keivavo!” 19 Wudi yai tepapuna iraraviya ma isovasovai. Maghinonai kaitupisi yai isorusoru ma irurudunei kama keivavo nuke, ma iberai da ivivi inimayamayai. 20 Maranai ivi namei ikovi, gara yebara dumadumana ivo tawayei ma kana gara wosina ivi kotei. Ma iruteina kasibuwei da ita tututani kubina.

Yesu Korosi Yai Itututani

(Matiu 27:32-44; Luk 23:26-43; Jon 19:17-27)

21 Inenae ma ketaki yai koroto kana wava Saimon, meyagi yoghoyogho wai, irurui ku meyagi ghamanakina na inepotei, ma touvighavighaviya idarui da Yesu kana korosi ita kavari. (Saimon na koto Sairini, Aleksanda ma Rufas asi mamai.) 22 Yesu iruteina neyei ku dobu sago eworeworei Golgata, (iyamna na “Teuteu dobuna.”) 23 Nani dobunai wain ma me itupavirai ini vavana bunamina ma ibera tovoni da ita verei da itumai, ma umana ibasarei. 24 Nani dobunai itututani. Ma kana gara, ituparereghi, ma dais ivi rekwei da ita kitai da iyai mike garana ita veiya.

25 Boiboghi kana madeghapu wai na itututani. 26 Giruma vi wavu ki sakovina Yesu vovonai itutui kana korosi tepanai na ivavo, “Dam Jiu Keivavo.” 27 Yapiyapi ravasi asi viruwa kasi korosi yai itututanisi Yesu meiteni, sago kataiyanai ma sago dugenai. ^{▼▼15:27-28Giruma katamanisi ruwamtousi sinenai na emakemake: Ma avai kikiverena igirugirumi na nuke itupuwa, “Ikitai na kama berabero ravana nuke.” (Aisaiya 53:12)}

29 Rava ine nae ma itatapai, ivivi kunu weiweina ma ivivi namei, “Aa! Kuvavo da tempol kuta rikai ma mara aroba sinenai kuta vowa meyei! 30 Karaweni na korosi yai ke soru ma kwi yawasa meyem!”

31 Ma bade nuke prist babadisi ma touvibeyebeyena Mosese ina vigheiyenai Yesu ivivi namei, ma ivivi sisiya vivirana, “Rava ruwamtousi ivi yawasisi ma iya kovokovoghina ini yawasa meyei! 32 Ivavo da touna Keriso, Meimeituwa ina vinevine Touviyawasa, Israel asi Keivavo, karaweni korosi yai ina soru, ta kitai ma ta tumetumei!” Ma asi viruwa Yesu nevanevanai itututanisi na meiteni ivivi varaberowanei.

Yesu Isiraghe

(Matiu 27:45-56; Luk 23:44-49; Jon 19:28-30)

33 Madeghapu wai dobu tupana nubakutuva iruputani, inae da yabodiri itavira. 34 Yabodiri itatavira ma Yesu igarara rukwatu ponana ghamanakinai, “Eloi, Eloi, lema sabatani?” Iyamna na, “Aku Meimeituwa, Aku Meimeituwa, avikubina ku ne kuyoweku?” ^b

35 Rava ruwamtousi na ivivi meimeiriyana ma igayogayo na ivi yanei ma ivi pupuwei kubina, ivavo bo, “Koviyana, Elaija eworeworei!” 36 Ravasi sago ivuru ma purapura ponuponuna iveiya ku wain damidamisina itupakutuvi ma siu damonai itupe susuri. Ma ivopaini Yesu ku mutu kwapirina ma ivavo, “Ko koyaghi mede ta kitai Elaija epitipiti korosi yai ina teresoru wei!”

37 Yesu ponana ghamanakinai igarara ma isiraghe. 38 Gara nabanabana tempol sinenai irororoke, wasa vokuwaya kirakinina ipapayaraghi, na itamosika tepanai da isoru ku gaburina. 39 Touvighavighaviya badana korosi maghinonai imeimeiri na Yesu ikimakava isiraghe na ikitai ma ivavo bo, “Weni korotona na vagheina Meimeituwa natuna!” 40 Weivine ruwamtousi na nani, uwamai imeiri ma ikitakita. Sanasiyai na Meri Magadalin, Meri, Jems kiki ma Joses asi maduwa, ma Salome. 41 Maranai Yesu Galili yai, weni weivinesi iwagiwagisei ma ivo vowagui. Nani dobunai na bade weivine ipesari sasara iyavo ipiti yavuyavu ku Jerusalem.

Yesu Idogoi

(Matiu 27:57-61; Luk 23:50-56; Jon 19:38-42)

42 Ivivi kuririsi na tura kayokayowana marana (touna marana na Sabati maghinonai.) Josepa koto Arimatiya isegha. Touna Sanhedrien vovo viviranina sago ivivi koyakoyagha Meimeituwa ina Koyagha ipitipiti kubina. Vagheina ma ere maghitepatorana inerui Pailat kurina ma ivi baghai Yesu tupuwina kubina. ^{▼▼15:42-43Dam Jiu asi Sabati mara patapatana Fraide yai yabodiri eyoriyori na ikare, ma Satade yai yabodiri eyoriyori na ekovikovi.
,} ^{▼▼15:42-43Dam Jiu asi vigheiyena evavavo da tousi rava esirasiraghe nani maranai ina dogosi. Yabodiri eyoriyori na Sabati ikarei, touna kubina Josepa iyaghiyaghina da Yesu tupuwina ina dogoi.} 44 Pailat irusakwara, maranai ivi yanei da Yesu namada isiraghe. Touvighavighaviya badana ighorei ipiti ma ivi taravirei mike da namadani kava isiraghe, touvighavighaviya badana ivi segha da isiraghe. 45 Vagheina ma Pailat Josepa ivi vagheinei da Yesu tupuwina ina veiya.

46 Josepa gara ghavoghavorina kavakavana ma gurinakina igimari, tupuwina itere soruwei, garai igerei ma ku guba itere runi. Wakima bagibaginai ibouni ma ipapai. Muriyai wakima ghamanakina benabenana ma dubidubina itabiri da guba kana nenerui ikasi potai. 47 Meri Magadalin ma Meri, Josepa ina maduwa, ikitai Yesu tupuwina ma iterei.